Te heiva i Tahiti, ’o te hō’ē ia tau faufa’a roa a’e nō te hīro’a ’e te iho tumu Mā’ohi. E tau ta’upiti teie ’o teie riro ’ei ha’apeura’a nō tō tātou nūna’a. E ’ōro’a au teie e tāhō’e nei ia tātou. Arata’ihia e te fa’atura, te nīno’a mana’o e fa’atū’atiati nei i teie fa’anahora’a, tē fa’a’ite nei tātou i tō tātou ’a’au mēhara i te mau tupuna tae noa atu i te mau rahu’a nō te tauāhemo, nō te taunei et nō te tauāmuri ’o tē ha’aparare nei’ e ’o tē ha’aparare atu i tō tātou parau i nā poro e hā o te ao nei.

Mai te 4 ē tae atu i te 20 nō tiurai, e fa’a’ite teie mau tāne ’e teie mau vahine i te hōhonura’a o tō rātou iho tumu mā’ohi mā te fa’atura atu i te tumu parau i mā’itihia e rātou iho ’aore rā i te mau parau āu’iu’i. E mea nā roto ia i te ’arori o te ’ori tahiti ānei, te mau ’āuri rau o te tārava ānei, te ’aravihi o te mau rima’ī ānei ’aore rā i e te mau tino pāutuutu o te tū’aro.

E ‘amui mai te mau rahu’a nō te tata’ura’a hīmene tumu ’e ’ori tahiti i ni’a i te tahua nō To’atā. E fa’anahora’a tia’i-maoro-hia i te roara’a o te matahiti, arata’ihia e te mau ra’atira pupu. E fa’ahanahanara’a teie nō te hīmene tumu, te ’ori, te ’ōrero, te fa’a’ōra’a i te hīro’a o terā ’e terā mata’eina’a, o terā ’e terā mata’eina’a motu tae noa atu i te a’ia’i o te fenua nei.

’Ua ’atutu te parau o teie ta’upiti nā te Moana Nui a Hiva ’e nā te ara. Nā te reira i ha’apāpū i tō tātou iho tumu mā te ha’apūhara i tō tātou ta’ere. E fa’aara i roto ia tātou iho i tō tātou ’ā’au fāri’i, auturuturu ’e te autaea’e. ’Ua pāpū ia tāua ē : “’O tāua ihoā e te Nūna’a Mā’ohi.”

Te Heiva i Tahiti, te tau teie e pāpū ai te nūna’a i te ’aravihi o te mau tāparau, te mau rohipehe, te mau rohiparau, te feiā ’ori, te feiā hīmene, te feiā rima’ī, ’e te feiā ato’a e fa’a’una’una nei i teie ’ōro’a tumu nā roto i te vauvaura’a mai i tō rātou ’aravihi, tō rātou here i tō rātou fenua, i tō rātou nūna’a, i tō rātou hīro’a tumu, noa atu te mau maumaura’a e rave rau, noa atu te mau tāfifira’a e puhā mai, noa atu te mau tapitapi e tupu mai, i fa’aoti na tō tahito ē, e ’ārue, e fa’ahanahana i te fenua nā roto i teie mau fa’anahora’a ’oa ma te ’ā’au tae.

Tē tītau-manihini atu nei au ia ‘outou ’ia haere mai e fa’a’ite i tō ‘outou tāpa’o fa’atura ‘e te ha’amāuruuru nō te ‘ohipa fa’ahiahia roa ’o tei ravehia mai e tā tātou mau pupu nō teie Heiva i Tahiti 2024. ‘Ia vai noa te tura i roto ia tātou ‘e ‘ia mau teie tu’utu’ura’a i tā tātou faufa’a tumu i te u’i hou.

‘Ia ora te Nūna’a o te Fenua Mā’ohi !’Ia ora te Hīro’a ’e te Iho Tumu Mā’ohi! ‘Ia ora te Heiva i Tahiti 2024!